د شيخ زايد پوهنتون د شپې برنامې څخه ۲۵ تنه محصلان فارغ شول.
نن پنجشنبه د ۱۴۰۳ هـ.ش کال د مرغومي مياشتې ۱۳مه، چې د ۱۴۴۶ هـ.ق کال د رجب المرجب مياشتې له لومړۍ نیټې سره سمون لري، د شيخ زايد پوهنتون له دوو پوهنځيو اقتصاد، حقوق او سياسي علومو د شپنیو برنامو څخه ۲۵ تنو محصلانو د یوې ګډې غونډې په ترڅ کې د فراغت سندونه تر لاسه او ټولنې ته د خدمت په موخه وړاندې شول.
هغه غونډه چې په همدې موخه نن ورځ د شيخ زايد پوهنتون نهم بلاک د غونډو په تالار کې رابلل شوې وه، د يادو پوهنځیو رئيسانو، استادانو، کارکوونکو، د فارغېدونکو محصلانو خپلوانو او محصلانو ګدون کړی و.
د قرآن کريم څو مبارکو آیتونو له تلاوت وروسته د اقتصاد او حقوقو پوهنځیو رئيسانو ویناوې وکړې، دوی په خپلو خبرو کې فارغېدونکو محصلانو او د هغوی خپلوانو ته مبارکۍ ورکړې او محصلانو ته یې د زده کړو د دوام تر څنګ ورسپارل کېدونکي دندې په پوره صداقت ترسره کولو لارښوونې وړاندې کړې.
غونډه فارغېدونکو محصلانو ته د تصدیق پاڼو په وېشلو پای ته ورسیده.
نشراتو او عامه اړیکو آمريت
