د وترنري علومو پوهنځي محصلانو ترمنځ علمي رقابتي سیمینارونو سیالي ترسره شوه.
د يادو سیمينارونو د پیل په مراسمو کې د وترنري علومو پوهنځي د فرعي فرهنګي کمېټې مسؤل پوهنیار مصطفی لودین لخوا د یادې سیالۍ په اړه لنډ معلومات وړاندې کړل او ویې ویل؛ چې د یادې سیالۍ څخه یې موخه د محصلانو ترمنځ علمي او سالم رقابت، مطالعې ته هڅونه، علمي ظرفیت لوړوالی او په خپلو منځونو کې علمي رقابت رامنځته کول دي.
د وترنري علومو پوهنځي استاد پوهندوی اجمل خوستي پخپله وینا کې هغه محصلان چې سیمینارونه یې ارایه کړل وستایل او دا ډول سیالۍ یې د محصلانو د پوهې او علم زیاتوالي لپاره مثبتې وبللې. په پای کې غوره سیمینار ارایه کوونکو ته ستاینلیکونه او ډالۍ ورکړل شوې.
نشراتو او عامه اړیکو آمريت
