شيخ زايد پوهنتون د افغانستان د سولې د توافقنامې پر سر د بحث لپاره يو ورځنی ورکشاپ راوبله
په دغه ورکشاپ کې د شيخ زايد پوهنتون د علمي چارو مرستيال او سرپرست رئيس پوهندوی شفيع ګل شفيقي، د محصلانو چارو مرستيال پوهنيار محمد داود بابکرخيل، د نږدې ټولو پوهنځيو رئيسانو، امرينو، يو شمېر استادانو او د محصلينو استازو برخه اخيستې وه.
دغه ورکشاپ، چې د شيخ زايد پوهنتون اړوند د سولې په مرکز کې رابلل شوی و، د قران مجيد د څو مبارکو ايتونو له تلاوت وروسته د شيخ زايد پوهنتون د سولې مرکز مسوول او داستادانو چارو امر پوهنيار فاروق جان منګل د ننني ورکشاپ پر اړتيا او اهميت خبرې وکړې.
ښاغلي منګل په افغانستان کې د پايښت لرونکې سولې د تامين لپاره اړينه وبلله، چې د ټولنې ټول اقشار بايد د طرحې په تړاو خپل نظرونه ورکړي، اړين اصلاحات پکې راولي او ترڅنګ يې نظرونه راټول، توحيد او د غور او بررسۍ په پار يې اړوند مراجعو سره شريک کړي.
وروسته د شيخ زايد پوهنتون د علمي چارو مرستيال او سرپرست رئيس پوهندوی شفيع ګل شفيقي د سولې په تړاو د لوړو زده کړو وزارت له لوري راليږل شوې پيشنهادي طرحه هر اړخيزې خبرې وکړې.
ښاغلي شفيقي له رئيسانو، امرينو او استادانو وغوښتل، چې د همدې طرحې د غني کولو، يو شمېر برخو د تعديل او يا هم په تړاو يې نظر مطرح او وروسته به يې توحيدي بڼه د اړوند ادارو سره شريکه شي.
د شيخ زايد پوهنتون علمي مرستيال له افغان دولت مننه وکړه، چې په هېواد کې پايښت لرونکې سولې ته ژمن او د نظرونو داخيستو په پار يې دغه طرحه کې د ټولنې د نورو قشرونو ترڅنګ د پوهنتون له استادانوسره هم شريکه کړې ده.
وروسته د ناستې ګډونوال په ګروپونو وويشل شول او د سولې په تړاو د ترلاسه شوې پيشنهادي طرحې مواد يې تر بحث لاندې ونيول. په ګروپونو کې هغه مسايل مطرح او هراړخيز بحث پرې وشو، چې مبهم او يا يې هم تعديل او سمون ته يې اړتيا درلوده.
د ورکشاپ ګډونوالو د پيشنهاد شوې طرحې يو شمېر مسايل تائيد او د يو شمېر نورو يې بيا د تعديل غوښتنه وکړه او په تړاو يې خپل نظرونه څرګند کړل
