دکمال خان بند د پرانیستې په ویاړ شیخ زاید پوهنتون کې د والیبال سیالۍ په لاره واچول شوې
دکمال خان بند د پرانیستې په ویاړ شیخ زاید پوهنتون کې د والیبال سیالۍ په لاره واچول شوې نن سه شنبې ورځ (۲۶/حوت/۱۳۹۹) دشیخ زاید پوهنتون محصلانو چارو معاونیت د دولسو پوهنځیو ترمنځ د کمال خان بند د خوشالیو لمانځلو په پار د ولیبال سیالۍ پیل شوې .
د یادو سیالیو ټاس اچوونه کې دشیخ زاید پوهنتون د محصلانو چارو مرستیال، اداري مرستیال، دپوهنځیو رئیسانو، استادانو سر بیره د خوست ولایت د ورزشي امریت امر هم ګډون درلود، چې د اقتصاد او ادبیاتو پوهنځیو ټیمونو ترمنځ د لوبو سیالي پیل شوه. په پیل کې دمحصلانو چارو مرستیال پوهنیار محمدداود بابکرخیل د کمال خان بند د ارزښت او د اوبو مدیریت په تړاوو خبرې وکړې او زیاته یې کړه، چې افغانان نن یو لوی ملي ارمان ته په رسیدو دي، ښاغلی بابکرخیل وویل چې ددې بند په جوړیدو سره به افغانستان په یوه رښتوني زراعتي هیواد بدل شي او د هیواد اقتصاد به نور هم پیاوړی شي.
ورپسي دخوست ولایت د ورزش امر ښاغلي عزیز ملنګ دکمال بند په پرانیستو خوښي څرګنده کړه او د مبارکۍ ترڅنګ یې محصلینو ته د ورزش اړوند ګټې هم بیان کړې. د یادولو وړ ده چې شیخ زاید پوهنتون د خپل عملیاتي پلان له مخې په راتلونکي کې دکمال خان بند او د اوبو ارزښت په تړاو نور علمي سیمنارونه او بحثونه هم په پام کې لري.
