د جیولوجیستانو د نړیوالې ورځې په مناسبت د معدنونو ریاست او د شیخ زاید پوهنتون ترمنځ د همکاریو هوکړه لیک لاسلیک شو
تیره ورځ(۱۱ حمل ۱۴۰۰)چهارشنبه د جیولوجیستانو نړیوالې ورځې په مناسبت د امام ابوحنیفه رح د غونډو په تالار کې د ټولنیزو علومو اړوند د تاریخ او جغرافیې څانګې او د خوست ولایت د معدنونو ریاست سره د همکاریو هوکړه لیک لاسلیک او د یادې ورځې په اړه سمینارونه د قرانکریم د څو مبارکو ایتونو له تلاوت وروسته وړاندې شول.
په سمینار کې د پوهنتون علمي مرستیال شفیع ګل شفیقي، مالي او اداري مرستیال فیض الله فیض، د پوهنځیو رئیسانو، استادانو، د معدنونو رئیس لایق محمد او د یاد ریاست اداري کارمندانو او زیات شمېر محصلانو ګډون کړی و.
د استاد پوهنیار عصمت الله زیارد پیلیزې وینا وروسته، علمي مرستیال شفیقي په هیواد کې د جیولوجیستانو په ارزښت او ضرورت په تفصیل سره خبرې وکړې، د افغانستان د جیولوجي په تاریخي پس منظر یې رڼا واچوله او زیاته یې کړه، چې د افغانستان جغرافیه کې ۱۴۰۰قیمتي منرالونه موجود دي، چې له دې جملې څخه لاجورد یې شاوخوا ۴۵۰۰ کاله پخوا د یوې قیمتي تیږې په توګه پیژندل شوې وه.
ورپسې د معدنونو ریاست اړوند انجینر وکیل خان افتاب لخوا (د خوست ولایت جیولوجي) ترعنوان لاندې د منرالوجي په برخه کې، د ټولنیزو علومو پوهنځی استاد نظیرګل صدیقي د( ډبرو دوران) په برخه کې او د خوست دارلمعلمین رئیس او مشر استاد سید احمد شاه خالص د (جیوکرونالوجي) په برخه کې په زړه پوري سمینارونه ګډونوالو ته وړاندې کړل.
د یادونې وړ ده، چې د شیخ زاید پوهنتون رهبري د پوهنتون د محصلانو د علمي ارتقاء په موخه، ورته ډول تفاهم لیکونه له نورو ریاستونو سره هم لاسلیک کړیدي
