د طب پوهنځي څخه ۹۸ ډاکټرانو د فراغت سندونه تر لاسه کړل.
هغه راټولیدنه چې په همدې موخه نن ورځ د ۱۴۰۲ هـ.ش کال د چنګاښ مياشتې ۲۵مه نيټه، د شیخ زاید پوهنتون امام ابو حنیفه رحمة الله په تالار کې را بلل شوې وه، د شیخ زاید پوهنتون رئیس شیخ محمد یعقوب نيازي، د طب پوهنځي رهبري او استادانو، د فارغانو محصلانو خپلوانو او ګڼ شمېر مېلمنو پکې ګډون درلود.
غونډه د قرآن کریم څو مبارکو آیتونو په تلاوت سره پیل شوه، ورپسې د شیخ زاید پوهنتون رئیس شیخ محمد یعقوب نيازي پرانستونکې خبرې وکړې، نوموړي فارغېدونکو محصلانو، د هغوی والدینو او د طب پوهنځي استادانو ته د يادې بریا او لاسته راوړنې مبارکۍ ترڅنګ فارغېدونکو ډاکټرانو ته په خطاب کې وویل؛ چې تاسو ته له دې وروسته په ټولنه کې ستر مسؤلیت در سپارل کیږي، خپل دا مسؤلیت کسب نه؛ بلکې عبادت وګڼئ او هیله یې وکړه چې خپلې زده کړې په همدې ځای پای ته و نه رسوي، بلکې لا پراختیا ورکړي او په خپل مسلک کې ځانونه ورسوي.
د طب پوهنځي رئیس پوهنیار ډاکټر عبدالله قادري هم راغلو مېلمنو ته د ښه راغلاست او مبارکۍ ترڅنګ، د طب پوهنځي په اړه لنډ ګزاش وړاندې کړ او له فارغېدونکو ډاکټرانو څخه یې وغوښتل چې خپلې راتلونکې تخصصي زده کړې په نړۍ واله کچه تر سره کړي، ترڅو د روغتیا په برخه کې د خپلو هېوادوالو اړتیاوو ته ځواب وویلی شئ.
د طب پوهنځي استاد پوهنوال ډاکټر جهان شاه ټولو فارغانو محصلانو او د دوی کورنیو ته د مبارکۍ تر څنګ، په خپلو خبرو کې وويل چې تاسو باید په هر صورت کې خپل طبي اخلاق، همدارنګه د ټولنې اقتصادي حالت په پام کې ونیسئ.
د محصلانو په نماینده ګۍ هر یو ډاکټر بیت الله زاهد او ډاکټر شېر اواز خان پکتین خبرې وکړې، دوی د خپلو استادانو او والدینو مننه او ستاینه وکړه، چې دوی یې په ډېرو تکلیفونو او مشکلاتو کې تر دې ځایه را رسولي دي.
فراغت غونډه د تصديق پاڼو په وېش او د دعاء په ویلو سره سره پای ته ورسیده.
نشراتو، اطلاعاتو او عامه اړیکو آمریت
