شیخ زاید پوهنتون کې د ۱۴۰۱ هـ.ل کال کانکور ازموینه پای ته ورسیده.
نن ورځ د ۱۴۰۱ هـ.ل کال د میزان میاشتې ۱۶ نیټه چې د ۱۴۴۴ کال د ربیع الاول میاشتې له ۱۲ نیټې سره برابره ده، شیخ زاید پوهنتون کې د کانکور ازموینې درې ورځینۍ لړۍ په پوره بريالیتوب سره پای ته ورسيده.
یاده ازموینه په ټول افغانستان کې په دريو پړاونو کې اخېستل کېږي، چې لومړی پړاو ازموینه یې هم مهال په ۳۳ ولایتونو کې له شاوخوا سل زره کسانو څخه واخېستل شوه، دویم پړاو ازموینه به یې د کابل ولایت مرکز او دریم پړاو ازموينه به د کابل ولایت ولسوالیو او په ولایتونو کې د کانکور ازموینې څخه د پاتې شویو کاندیدانو څخه واخیستل شي.
د شیخ زاید پوهنتون رهبري د ازموینې ملي ادارې له راغلي پلاوي سره یو ځای او په پوره همغږۍ سره د ازموینې په ښه او شفاف ډول ترسره کېدو کې هلې ځلې وکړې، چې دا دی لومړۍ پړاو ازموینه یې شیخ زاید پوهنتون کې په پوره بريالیتوب سره پای ته ورسيده.
د یادولو وړ ده، چې سږنۍ ازموینه کې د ټول افغانستان څخه شاوخوا یوسل او ۴۵ زره د دولسمو ټولګیو فارغین ګډون کوي، چې له جملې څخه به یې شاوخوا یوسل ۳۰ زره کسان لوړو او نیمه لوړو زده کړو ته لاره پیدا کړي، چې د خوست ولایت څخه هم په یاده ازموینه کې (۴۰۹۵) کسان ګډون کړی و.
پاتي د نه وي، چې شیخ زاید پوهنتون به له ټولو ولایتونو څخه تقرییاً تر (۴۰۰۰) څلورو زرو کسانو پوري جذب کړي.
د نشراتو، اطلاعاتو او عامه اړیکو امریت
