د عامې روغتیا اړوند د کرونا کنترول ټیم د شیخ زاید پوهنتون له درسي خونو څخه لیدنه وکړه

د عامې روغتیا اړوند د کرونا کنترول ټیم د شیخ زاید پوهنتون له درسي خونو څخه لیدنه وکړه.
نن ورځ ( ۱۳۹۹/۶/۱۰ ) د شیخ زاید پوهنتون رهبرۍ چې د عامې روغتیا اړوند د کرونا ټیم غړي هم ورسره وو، د مختلفو پوهنځیو درسي خونو کې د محصلینو وضعیت له نږدې وڅاره.پدې ترڅ کې، اداري مرستیال په خپلو سپارښتنو کې محصلینو ته وویل " کرونا یو ساري رنځ دی، چې په لیلیه او صنفونو کې په تیزی سره خپریدلای شي نو لازمي ده چې د ډاکټر صاحبانو خبرې او هدایات په پام کې ونیول شي. ددې لپاره چې پوهنتون د بندیدو سره مخ نشي ، نو حتمي ده چې د روغتیا ټیم هدایاتو ته جدي پاملرنه وکړئ. همداشان کچېرې کوم ملګری مو درته شکمن ښکاریدو په بیړې سره د صنف یا د لیلیې نماینده ته خبر ورکړئ". ورپسې د عامې روغتیا ریاست د کرونا کنترول مسؤل داکټر ګل احمد شاه په درسي خونو کې د خپلو همکارانو په مټ محصلین د کرونا لپاره چک کړل او دوی ته یې د مخنیوي کلکې سپارښتنې وکړې. هغه په خپلو خبرو کې محصلینو ته وویل چې په صنفونو کې د فزیکي فاصلې مراعتول ستونزمن دي، نو هر محصل ته ماسک اچول ( Mask is Must) او د لاسونو بار بار مینځل حتمي دي، تر څو د کرونا خپریدو مخنیوی شوی وي، کني خدای مه کړه تاسې به د کرونا خپریدو کې مساعدت کړی وي.هغه محصلینو ته وویل چې کچېرې مو په کوم ملګري د کرونا شک پیدا شو زر تر زره زمونږ سره پدې ( 0776275415) شمېره تماس ونیسئ" .په پای کې د پوهنتون رهبرۍ د راغلي ټیم څخه مننه وکړه چې د کرونا وژونکي وبا په خلاف مبارزه کې د خپل ولس ترڅنک ولاړ دي.
یاده دې وي چې د کرونا مخنیوي په پار د شیخ زاید پوهنتون لخوا سمینارونه، د خونو تعقیم او معلوماتي پاڼې وړاندې شوي دي.