د محصلانو چارو معاونيت لخوا د پوهنځيو له نماینده ګانو سره ناسته تر سره شوه.
نن یکشنبه د ۱۴۰۴ هـ.ش کال د ثور مياشتې ۱۴مه، چې د ۱۴۴۶ هـ.ق کال د ذوالقعدة میاشتې له شپږمې نیټې سره سمون لري، د شيخ زايد پوهنتون محصلانو چارو معاونيت کې د پوهنتون د دوولسو پوهنځيو د محصلانو له عمومي نماینده ګانو سره د ستونزو د حل او همغږۍ په موخه ناسته تر سره شوه.
د قرآن کريم څو مبارکو آیتونو له تلاوت وروسته د محصلانو چارو مرستيال پوهنیار مجاهد همت یار د تېر کال په فعالیتونو لنډه رڼا واچوله او د روان کال د محصلانو عملي کارونو او ظرفيت لوړونې ځینې پلانونه یې له ګډونوالو سره شريک کړل او دغه کال یې د محصلانو د عملي زده کړو لپاره یو غوره کال ياد کړ.
د محصلانو عمومي نماينده ګانو هم ځینې ستونزې چې محصلان ور سره په زده کړه ييزه برخه کې مخامخ دي، د ياد معاونيت له مسؤلینو سره شریکې کړې، چې د حل په موخه یې د اړوندو مسؤلینو لخوا ډاډ ورکړل شو.
نشراتو او عامه اړیکو آمريت
