د شيخ زايد پوهنتون طب پوهنځي دوویشتمې دورې فراغت غونډه ترسره شوه.
نن جمعه هغه غونډه چې په همدې موخه د شیخ زايد پوهنتون امام ابو حنیفه رحمة الله په تالار کې رابلل شوې وه، د شیخ زايد پوهنتون رئيس شيخ الحدیث مسلمين راشد سربېره، د پوهنتون مرستيالانو، د طب پوهنځي رئيس، استادانو، محصلانو او د فارغیدونکو محصلانو خپلوانو ګډون کړی و.
غونډه د قرآن کریم څو مبارکو آيتونو په تلاوت سره پیل شوه.
د شيخ زايد پوهنتون رئيس شيخ الحدیث مسلمين راشد فارغو محصلانو او د هغوی والدینو ته د شپږ کلن زحمت او خواریو څخه د فراغت مبارکي ورکړه، همدا ډول د نبوي غوره صفاتو د بيان تر څنګ د اسلام له نظره د طب ځینې نظریې بيان کړې، د روحي او جسمي ناروغیو د تفکیک او د هغوی علاج په اړه یې په زړه پورې خبرې وکړې او زياته یې کړه چې تر ټولو غوره ډاکټر هغه دی، چې روحي او ذهني تله یې برابره وي، د طبابت تر څنګ د قوي ایمان په ګاڼه هم سمبال وي.
نوموړي فارغو ډاکټرانو ته د خپلې دندې په صادقانه او ایماني اصولو سره سم پر مخ بېولو توصیه وکړه.
د علمي چارو مرستيال سيد اسماعيل روحاني فارغو محصلانو او د هغوی کورنیو ته مبارکي ورکړه، نوموړي فارغو محصلانو ته د خپلو خدماتو وړاندې کولو په وخت کې عقیدتي، فرهنګي او ټولنيزو ادابو په پام کې نيولو ترڅنګ د داسې نيکو اخلاقو څخه د کار اخيستلو توصيه وکړه، چې په ټولنه کې د شيخ زايد پوهنتون ښه استازولي وکړای شي.
ښاغلي روحاني زياته کړه؛ چې محصلان خپلې زده کړې په همدې ځای بس نه کړي؛ بلکې لا مخکې لاړ شي او د طب په مختلفو برخو کې تخصص تر لاسه کړي، تر څو ټولنې ته په ښه شان د خدمت جوګه شي.
د محصلانو چارو مرستیال او د طب پوهنځي استاد پوهنيار مجاهد همت يار ټولو فارغو محصلانو او د هغوی کورنیو ته مبارکي ورکړه او هيله یې وکړه چې ډاکټر صاحبان هغه ډول چې لازمه ده خپل طبي اخلاق په نظر کې ونيسي او د روغتيا په ډګر کې نورې لاسته راوړنې هم وکړي.
په پای کې يوتن فارغ تحصيل محصل ډاکټر حامد حبیب د ټولو محصلانو په استازیتوب خبرې وکړې، نوموړي د طب پوهنځي له استادانو همدا ډول د پوهنتون له رهبري مننه او قدرداني وکړه چې په تېره شپږ کلنه دوره کې یې له دوی سره نه ستړې کیدونکي هلې ځلې وکړې.
یاده دوویشتمه دوره کې (۷۵) محصلانو د فراغت سندونه واخیستل.
غونډه د تصدیق پاڼو په ورکولو او دعا په ویلو سره پای ته ورسيده.
نشراتو او عامه اړیکو آمریت
