د شيخ زايد پوهنتون محصلانو ترمنځ د فوټبال سيالیو پای لوبه تر سره شوه.

هغه سيالۍ چې څه موده وړاندې د شيخ زايد پوهنتون د دوولسو پوهنځيو، ليليې محصلانو او اداري کارکوونکو لوبډلو تر منځ په لاره اچول شوې وې، پای لوبه یې د کرنې او طب پوهنځیو محصلانو لوبډلو تر منځ تر سره شوه، چې طب پوهنځي لوبډلې وکړای شول چې دوه د یو په مقابل کې لوبه په خپل نوم کړي.
د محصلانو چارو معاونيت اړوند د ورزش مدیر شېر زمان شېردل له قوله؛ چې يادې سيالۍ د محصلانو ذهني سکون، مطالعې ته هڅونې، د محصلانو تر منځ صمیميت او یووالي ساتل او د فوټبال په برخه کې د محصلانو استعدادونو را برسېره کولو په موخه ترتيب شوي وې، چې شاوخوا شل ورځې یې دوام وکړ.
د يادولو وړ ده، چې د شيخ زايد پوهنتون محصلانو چارو معاونیت د ورزش د برخې مسؤلين تل هڅه کوي، چې د محصلانو بدني او ذهني روغتيا ساتلو او زده کړو ته د هڅونې په موخه د بېلا بېلو ورزشونو په برخه کې سيالۍ را منځته کړي.
نشراتو او عامه اړیکو آمريت