د حقوقو او سیاسي علومو، کمپيوټر ساينس او انجينري پوهنځيو څخه (۲۵۴) محصلان فارغ شول.

نن شنبه د ۱۴۰۳ هـ.ش کال د زمري مياشتې ۲۷مه، چې د ۱۴۴۶ هـ.ق کال د صفرالمظفر مياشتې له ۱۳مې نيټې سره سمون لري، د شيخ زايد پوهنتون له درېیو پوهنځيو د حقوق او سياسي علومو پوهنځي له دوو څانګو څخه (۷۵)، د انجینري پوهنځي له مهندسي څانګې څخه (۷۴) تنه او د کمپيوټر ساينس پوهنځي له دوو څانګو څخه (۱۰۵) تنه محصلان فارغ شول.

د انجینري پوهنځي مهندسي څانګې او همدارنګه د کمپيوټر ساينس پوهنځي د فراغت غونډو په مراسمو کې د شيخ زايد پوهنتون رئيس شيخ الحدیث مسلمين راشد، په خپلو ویناوو کې فارغو شویو محصلانو او د هغوی خپلوانو ته د مبارکۍ تر څنګ د انجینري علومو او کمپيوټر ساینس علومو د ارزښت په اړه په زړه پورې ویناوې وکړې.

ښاغلي راشد په خپلو خبرو کې وويل:((علم د الله جل جلاله څخه په ويره او تقوا کې دی؛ نه د زياتو معلوماتو په حاصلولو کې)) همدارنګه محصلان یې د الله جل جلاله د احکامو اطاعت، پرهيزګاري، د لمانځه او قرآن کريم پابندي، خيانت او کبر کولو څخه د ځان ساتلو، د حق طرفداري او د انسانانو حقوقو ته درناوي په اړه ارزښتناکې توصیې وړاندې کړې او زياته یې کړه چې ستاسو مسلکي توب هغه وخت مفيد کيږي؛ چې د الله جل جلاله اطاعت پکې وي.

د نن ورځې فراغتونو په دوام تر دې دمه د شيخ زايد پوهنتون له نهو(۹) پوهنځیو څخه (۸۸۸) تنه فارغ او ټولنې ته د خدمت په موخه وړاندې شول او د شيخ زايد پوهنتون اداره دوی ته په راتلونکي کې په خپلو مسلکونو کې د لا پرمختګ او نورو برياوو هيله کوي.