د شیخ زاید ستوري تر عنوان لاندې د کرکټ سیالۍ پای ته ورسیدې.
دغه لس اوریزې لوبې چې څو ورځې وړاندې د شیخ زاید پوهنتون دوولس پوهنځيو، لیلیې او اداري کارکوونکو ترمنځ پیل شوې وې، د کرنې پوهنځي په اتلولۍ پای ته ورسیدې.
د پای لوبې ټاس د اقتصاد پوهنځي لوبډلې وګاټه او خپله یې د توپ وهنې پرېکړه وکړه، چې د لسو اورونو په لوبولو سره یې وکولی شول چې مقابلې لوبډلې ته ١٧٨ منډې هدف وټاکي او په بل اړخ کې بیا د کرنې پوهنځي لوبډلې یاد هدف په وروستي اور کې د څلورو لوبغاړو په له لاسه ورکولو سره پوره کړ.
د سیالیو غوره لوبغاړی د کرنې پوهنځي نورولي او د پای لوبې غوره لوبغاړی عمران و نومول شو، د ورزش کمېټې غړي او غوره لوبغاړي هم په معنوي ډالیو ونازول شول.
د پای په مراسمو کې د محصلانو چارو مرستیال پوهنیار مجاهد همت یار لوبغاړو او محصلانو ته وویل؛ چې دوی به په راتلونکي کې هم محصلانو ته نورې ورزشي برنامې جوړې کړي او هم به دغه کال د علمي برنامو له پلوه ښه کال وي.
د یادونې وړ ده چې شیخ زاید پوهنتون په تېر کې هم محصلانو ته د زده کړو تر څنگ بېلا بېلې تفریحي او ورزشي برنامې په لاره اچولي دي ترڅو محصلان لا تشویق او وهڅول شي.
نشراتو او عامه اړیکو آمریت
